1 Kronika 15

Dung i didokkon si Daud ma paulion angka bagasna di bagasan huta ni si Daud, diparade do huhut sada inganan di poti ni Debata, jala dipahembang sada undungundungna.

Uju i ma didok si Daud: Ndang jadi usungon ni manang ise poti ni Debata, dungkon ni halak Lepi; ai nunga dipillit Jahowa nasida mangusung poti ni Debata dohot marhalado di Ibana ro di saleleng ni lelengna.

Jadi dipaluhut si Daud ma sandok Israel tu Jerusalem, asa diboan nasida poti ni Jahowa nangkok tu ingananna, na pinadirina hian disi.

Dipaluhut si Daud huhut pinompar ni si Aron dohot halak Lepi.

Sian pinompar ni si Kohat: Si Uriel, indukna i, ro di hahaanggina, saratus duapulu halak toropna.

Sian pinompar ni si Merari: Si Asaya, indukna i, ro di hahaanggina, dua ratus duapulu halak toropna.

Sian pinompar ni si Gerson: Si Joel, indukna i, ro di hahaanggina, saratus tolupulu halak toropna.

Sian pinompar ni si Elsapan: Si Semaya, indukna i ro di hahaanggina, dua ratus halak toropna.

Sian pinompar ni si Hebron: Si Eliel, indukna i ro di hahaanggina, ualupulu halak toropna.

Sian pinompar ni si Usiel: Si Abinadab, indukna i ro di hahaanggina, saratus sampulu dua halak toropna.

Dung i dijou si Daud ma malim Sadok dohot si Abiatar ro di halak Lepi i ma: Si Uriel, si Asaya, si Joel, si Semaya, si Eliel dohot si Abinadab.

Jala didok rajai tu nasida: Hamu do angka partogi ni halak Lepi marompuompu; dibahen i parbadiai hamu ma dirimuna dohot hahaanggimuna i, asa diboan hamu poti ni Jahowa, Debata ni Israel, nangkok tu inganan naung hupadiri disi.

Ai na jolo, tagan so disi dope hamu, dibahen Jahowa, Debatanta i do sada parsirangan di tongatonga ni hita on, ala so italului Ibana songon patutna.

Jadi manguras be ma angka malim dohot halak Lepi, asa boanonna nangkok poti ni Jahowa, Debata ni Israel.

Jadi diusung halak Lepi ma poti ni Debata marhaluhalu di abarana, songon naung tinonahon ni si Musa hian, hombar tu hata ni Jahowa.

Dung i didokkon si Daud ma angka induk ni halak Lepi, asa dipadiri hahaangginasida i, angka parende mardongan parhinaloan marragamragam, angka hasapi, arbap dohot sordam, asa dipalu angka i pariburhon soara, paganda las ni roha.

Jadi dipadiri halak Lepi ma si Heman, anak ni si Joel, jala sian angka hahaanggina si Asap, anak ni si Berekia; jala sian pinompar ni si Merari, hahaangginasida i, si Etan, anak ni si Kusaria.

Jala dongannasida muse angka hahaangginasida rongkanan paduahon: Si Sakaria, si Ben, si Jasiel, si Semiramot, si Jeiel, si Uni, si Eliab, si Benaia, si Maaseia, si Matitia, si Elipelen, si Mikneya, si Obed-Edom, si Jeiel, angka sijaga pintu.

Alai anggo halak parende, i ma si Heman, si Asap dohot si Etan mardongan hesekhesek tombaga paribur soara.

Alai anggo si Sakaria, si Asiel, si Semiramot, si Jeiel, si Uni, si Eliab, si Maaseia dohot si Benaia mardongan hasapi marsoara boruboru.

Alai anggo si Matitia, si Elipelen, si Mikneya, si Obed-Edom, si Jeiel dohot si Asasia mardongan arbap marsoara na sihil laho marendehon.

Alai anggo si Kenania, induk ni halak Lepi manguluhon parendeon dohot mangajarhon parendeon, ai na pande do ibana.

Ia si Berekia dohot si Elkana sijaga pintu di lambung poti.

Alai anggo si Sebania, si Josapat, si Netaneel, si Amasai, si Sakaria, si Benaia dohot si Elieser, angka malim i tahe mamalu sarune di adopan ni poti ni Debata; ianggo si Obed-Edom dohot si Jehia gabe sijaga pintu di lambung poti.

Dung i borhat ma si Daud rap dohot angka sintua ni Israel ro di angka induk ni saribu halak laho mamboan poti parpadanan ni Jahowa nangkok sian jabu ni si Obed-Edom marlas ni roha godang.

Jadi dung ditumpak Debata halak Lepi, angka na mangusung poti parpadanan ni Jahowa, dipelehon nasida ma pitu lombu naposo dohot pitu birubiru tunggal.

Alai anggo si Daud marpangkean baju juba sian hain na halus, songon i nang sude halak Lepi, angka na mangusung poti i dohot angka parende, nang si Hanania, induk manguluhon angka halak parende; marpangkean baju epod sian hain na bontar do si Daud huhut.

Jadi sandok Israel mamboan nangkok poti parpadanan ni Jahowa mardongan olopolop dohot soara ni sarune, sordam dohot arbap dipagogo huhut soara ni hasapi dohot tulila.

Jadi dung sahat poti parpadanan ni Jahowa tu bagasan huta ni si Daud, gabe mandulo ma si Mikhal, boru ni si Saul sian pandiloan; jadi dung diida raja Daud i marhajingjang dohot manontori, marhu ni roha ibana mida rajai.